आठवण

कधीतरी अशाच निवांत क्षणी
तिचं येणं होतं
मन आधीच हळवं,
त्याला तर निमित्तच होतं

सहजतेच्या पडद्यामागून
ती वादळ घेऊन येते
उजळलेल्या स्वप्नांवरून
काजळ फिरवून जाते..

संध्याकाळची रिमझिम
अन् तिचं अवेळी येणं
बरसणारे काळे ढग
डोळ्यांत ठेवून जाणं

सरलेलं सारं काही
ती जिवंत करून जाते..
नव्याने फुलणार्या फुलांना
सहजपणे चिरडून जाते

मनासारखं सांधलेलं सांधलेलं सारं
क्षणात विस्कटून जातं..
असंच कधीतरी अनाहुतपणे
'तिचं' येणं होतं...

अदिती

The Secret Love

I love it when you look at me
secretly,hiding your face..
And follow me the way back home
trying to catch my pace

I love it when you turn aside
when I catch you staring at me
and when I frankly smile at you,
You too smile back with glee

I love it when you write my name
in your notebook,and then erase
and hide your anger when I ignore you,
with the curtain of smiling face!

I love it when you miss me
when I am not around
and the way your heart skips a beat
when you hear my sound

I love it when the words fall short
when you try to talk with me
I love the way you hide the fact..
That you love me secretly!!

Aditee Joshi

अज्ञात

कुणाचे असे भास छळती अताशा
कुण्या काळचे, ना कुणाला कळे
नभी घन असे गूढ दाटून येता
उगा नीर नेत्रांतूनी का गळे

असे भोवताली सुखाचा सुवास
मनाला भरे का उगा कापरे
काळोख कसला उरी दाटलेला
मन हे उगा का सुखा विस्मरे

कुणाची कमी सतविते या जिवाला
कुणास्तव उदासीन क्षण हे असे
कुणास्तव जिवाची उगा घालमेल
कुणी लावले या मनाला पिसे

उगा या मनी आज काहूर कसले
कश्या आगळ्या याच संवेदना
गड्या हीच अज्ञात जाणिव वेडी
कशी ओळखीने छळे या मना...


अदिती

जपू एकट्याने घडी जीवनाची

नको ओढ ती रे कुणाची,कशाची
जपू एकट्याने घडी जीवनाची
नको फार गुंता आता जीवनात
नको अडकणे रे कुणात,कशात

पुरे जाहले रोज झुरणे अवेळी
पुरे जाहले आठवांचे उसासे
तुझ्यासाठी मी झेलले दाह सारे
आता सावरू दे मनाला जरासे

कधी बंध तुटले,कळलेच नाही
मला तू,तुला मी उमगलेच नाही
आता ओढ अश्रूंत वाहून गेली
सुखाची मनाशी चुकामूक झाली

गड्या व्यर्थ हे प्रेम,सारेच खोटे
क्षणांना उगा जाणिवांचे धपाटे
आता ना तमा रे कुणाची,कशाची
जपू एकट्याने घडी जीवनाची...


अदिती

ओढ

सावळ्या रंगात का
घन आज हे न्हाले
सावळ्याची ओढ वेडी
मन पाखरू झाले

बासरीचा सूर घुमतो
फुलती स्वप्नफुले
पैलतिरातून साद ऐकुनी
जीव उगाच झुरे

पैलतिरावर तो मुरलीधर
वाजवितो वेणू
धुंद होवुनी मयुर नाचती
हसते इन्द्रधनु

छुमछुम करती अधीर पैंजणे
श्यामनिळ्याचे भास
पाउल वळते पैलतिरी त्या
मोहून जातो श्वास

वेड्या त्या सावळ्या सख्यास्तव
धडधडते हे ऊर
वेड लाविती उगा जिवाला
त्या वेणूचे सूर

आज सख्या रे माझे 'मी'पण
हरवून मी बसले
तुझे सावळे रूप मनोहर
मनामध्ये ठसले

तव स्पर्शाची तहान आता
शतजन्मांची आस
तुझीच मूर्ती मनात माझ्या तुझाच रे सुवास

रे श्रीरंगा धडपडते मी
तव भेटीस्तव आज
बरस बरस तू अभ्र होवुनी
भिजव अंगांगास..

तृप्त होवुदे धरणी सारी
तृप्त कर तन मनास
तळमळते ही वेडी राधा
बरस बरस तू आज...


अदिती

सैनिकहो तुमच्यासाठी

वादळाची शाल करुनी
अन तृषेची ढाल करुनी
कंटकांच्या गालिच्यावर
पाउले पडती

झेलला अंधार आहे
वादळाचा वार आहे
हासण्याने परी तयांच्या
दाहही कुढती

शौर्य ज्यांचा धर्म आहे
त्याग ज्यांचे कर्म आहे
मातृभूमिस्तव जयांची
मृत्यूवर प्रीती

अश्रू अलंकार ज्यांचा
घर्म हा शृंगार ज्यांचा
तेच पोलादी गडी हे
विश्व रे जपती

कोटी कोटी प्रणाम त्यांना
शत शत सन्मान त्यांना
मातृभिमिस्तव जयांनी
दिधली आहुती...


अदिती

मृगजळ

मन हरखून जाते पाहुन तुजला,
हुरळून जाते पार..
हास्य उमटते चेहर्यावरती
जग भासे अलवार..!

देही फुलतो मोरपिसारा
एकच लागे आस
मन धडपडते तुझ्याचसाठी
तव भेटीचा ध्यास

वैशाखातही कृष्ण अभ्र का
गगनी या दिसती?
भरदिवसाही शीत तारका
मनामध्ये वसती

रवी प्रखर हा आग ओकतो..
देही तप्त झळा
तरी का गातो श्रावणगीते
तहानलेला गळा??

तव भेटीची ओढ जिवाला,
पैलतिराची आस
पैलतिर तो गाठण्याचा
तुझ्याचसाठी ध्यास

वणवण करितो जीव तुझ्यास्तव
जाणुनही अज्ञात
तुझे भासणे फक्त स्वप्न रे
मृगजळ फक्त अफाट..
तो मृगजळ फक्त अफाट..


अदिती जोशी