मृगजळ

मन हरखून जाते पाहुन तुजला,
हुरळून जाते पार..
हास्य उमटते चेहर्यावरती
जग भासे अलवार..!

देही फुलतो मोरपिसारा
एकच लागे आस
मन धडपडते तुझ्याचसाठी
तव भेटीचा ध्यास

वैशाखातही कृष्ण अभ्र का
गगनी या दिसती?
भरदिवसाही शीत तारका
मनामध्ये वसती

रवी प्रखर हा आग ओकतो..
देही तप्त झळा
तरी का गातो श्रावणगीते
तहानलेला गळा??

तव भेटीची ओढ जिवाला,
पैलतिराची आस
पैलतिर तो गाठण्याचा
तुझ्याचसाठी ध्यास

वणवण करितो जीव तुझ्यास्तव
जाणुनही अज्ञात
तुझे भासणे फक्त स्वप्न रे
मृगजळ फक्त अफाट..
तो मृगजळ फक्त अफाट..


अदिती जोशी